Truck driver todas sa sekyu

DASMARIÑAS, Cavite — Isang trike driver ang iniulat na pinagbabaril hanggang sa mapatay ng isang security guard na nakatalaga sa Golden City Subd. makaraang nakialam sa away ng huli at driver ng van ang biktima kamakalawa ng umaga sa Brgy. Salawag ng bayang ito.

Kinilala ng pulisya ang biktima na si Peter Omar Celis, 32, may asawa at residente ng Blk. 3, Lot 38 Phase 9 Golden City Subd. ng naturang lugar.

Samantala, ang suspek na boluntaryong sumuko sa pulisya ay kinilalang si Francisco Rosalejos, 26, at nakatalaga sa nasabing subdivision bilang sekyu.

Sa inisyal na imbestigasyon ni SPO1 Carlito Gener, may hawak ng kaso, naganap ang krimen dakong alas-8:30 ng umaga habang nagtatalo ang suspek at driver ng van dahil sa pagdaan nito sa exit gate imbes na sa entrance gate ng nasabing lugar.

Ayon pa sa ulat ng pulisya, nakialam umano si Celis sa mainitang pagtatalo ng suspek at driver ng van kaya napagbalingan ng init ng ulo ang biktima na pinagbabaril hanggang sa mapatay. (Ulat ni Crisitna Go-Timbang)