Mag-utol nalunod

LUCENA CITY — Kapwa nasawi sa pagkalunod ang magkapatid na batang lalaki habang ang mga ito ay naliligo sa isang ilog sa Brgy. Gulang-gulang, kamakalawa ng umaga.

Kinilala ng pulisya ang mga biktima na ideneklarang patay sa Quezon Memorial Hospital na sina Joel, 8 at Jonathan Gutierrez, 6 na pawang residente ng Purok Matahimik, Brgy. Gotta.

Sa imbestigasyon ng pulisya, lumalabas na naganap ang pangyayari dakong alas-11 ng umaga, kamakalawa habang ang mga biktima ay masayang naliligo sa ilog Iyam sa nasabing lugar.

Ayon pa sa ulat ng pulisya, ang mga biktima ay nagkaroon ng picnic, kasama ang kanilang mga kaanak sa naturang ilog ngunit lingid sa kaalaman ay magkasamang naligo ang magkapatid na hindi naman marunong lumangoy kaya nalunod dahil sa malalim na lugar ng ilog ang napuntahan. (Ulat ni Tony Sandoval)