Misis na nagpapa-sexy, grabe sa taga ni mister

Dahilan sa madalas na pagpapaseksi, pinagtataga ng isang mister ang kanyang misis bunga ng matinding selos sa pag-aakalang may kinahuhumalingan itong ibang lalaki matapos ang mainitang pagtatalo sa kanilang tahanan sa Tugbok District, Davao City, ayon sa ulat ng pulisya kahapon.

Ang biktima na nasa kritikal na kondisyon sa Mintal Hospital ay nakilalang si Sherlie Pepito. Ito ay nagtamo ng malalim na taga sa leeg at sa binti.

Nakilala naman ang suspect na mister na si Sacarias Pepito, 43.

Batay sa ulat na nakarating kahapon sa Camp Crame, dakong alas-6:15 ng gabi ng maganap ang insidente sa mismong tahanan ng mag-asawa sa Barangay Biao Escuela, Tugbok District sa nasabing lunsod.

Ayon sa inisyal na imbestigasyon nabulahaw ang mga kapitbahay ng mag-asawa dahilan sa pag-aaway ng mga ito dahil sa pagsususpetsa ng mister na may ibang lalaki ang kanyang misis.

Nasaksihan ng mga kapitbahay kung papaanong kumuha ng itak ang suspect at tinaga ang biktima kaya agad silang tumawag ng pulis.

Bago pa makatakas ang lalaki ay nasakote na ito ng mga tauhan ng pulisya at nakuha dito ang isang matalim na gulok na ginamit sa pagtaga sa misis.

Kasalukuyang nakapiit sa Davao City Jail ang nadakip na mister. (Ulat ni Joy Cantos)