Adik at pulis todas sa amok

BULACAN, Bulacan – Isang sinasabing drug-addict na umano ay nasa impluwensiya ng bawal na gamot ang iniulat na napatay habang naghuhurumentado matapos itong barilin ng isang pulis na kanyang sinaksak at napatay din, kamakalawa ng gabi sa Barangay Bambang sa bayang ito.

Ang drug addict na nasawi sa pinangyarihan ng insidente, bunga ng mga tama ng bala sa ulo at katawan ay nakilalang si Clifford Meneses, 29.

Namatay naman habang nilalapatan ng lunas sa pinagdalhang pagamutan sanhi ng malalim na saksak sa dibdib na tumagos sa puso si PO2 Ronilo Giron, 33, ng Barangay Malhacan, Meycauayan.

Batay sa ulat na tinanggap ni Bulacan Provincial director Emelito Sarmiento, nabatid na ang insidente ay naganap dakong alas-6:30 ng gabi makaraang humingi ng tulong sa pulisya ang isang Eddie Meneses, dahilan sa pagwawala at panghahabol ng saksak ng kanyang anak na noon ay bangag sa ipinagbabawal na gamot.

Agad namang nagresponde sa nasabing lugar ang nasawing pulis at hindi pa man sila nakakalapit sa hurumentado ay agad na siyang sinugod nito ng saksak.

Bagamat sugatan nakuha pa ring makapagpaputok ng baril ng pulis na nagsanhi sa pagkasawi ng hurumentadong adik. (Ulat ni Efren Alcantara)