Guro kinasuhan ng panggugulpi sa estudyante

DASMARIÑAS, Cavite – Posibleng mawalan ng trabaho ang isang guro ng mababang paaralan matapos na sampahan nang kasong child abuse ng kanyang estudyante na umanoy pinalo nito ng kahoy sa katawan at saka umano dinibdiban nang ayaw umamin na ito ang dumura sa sahig habang nagkaklase kamakailan.

Sinampahan ng kasong paglabag sa Republic Act 7610 o child abuse sa tanggapan ni Municipal Trial Court Judge Lorinda Mupas ay nakilalang si Estela Espiritu, guro ng Dasmariñas Bagong Bayan Elementary School.

Batay sa reklamo ng biktimang si Benedict Benevize, 10, residente ng Block 5,Lot 70, Bgy. San Antonio de Padua na noong nakalipas na Lunes dakong alas 10:00 ng umaga habang sila ay nagkaklase sa loob ng silid aralan ay may isa siyang kaklase na dumura sa sahig.

Dahil malapit lang sa kinaroroonan ng biktima ang dura ay agad na siya umano ang pinagbintangan ng suspek na agad naman nitong itinanggi.

Inutusan ng suspek ang biktima na punasan ito at pagkatapos na mapunasan ay lumapit sa una at hinampas ng isang kahoy at saka sinuntok pa sa dibdib na naging dahilan ng pagkakaroon nito ng galos. (Ulat ni Mading Sarmiento)