Ang biktimang si Naganon Suzuki, 40 , ay dinukot sa harapan ng kanyang tahanan sa 486-C Tamarind St., Clarkview Subdivision, Barangay Malabanias ng nasabing lunsod kamakalawa ng gabi.
Ayon sa imbestigasyon, dakong alas-10:15 ng gabi ng puwersahang isinakay ng apat na armadong kalalakihan na pinaniniwalaang miyembro ng bigtime kidnap for ransom syndicate ang biktima.
Ang mga suspect ay lulan ng isang kulay abong pick-up na hindi nakuha ang plaka.
Isang nakilala sa pangalang Aillen Rosario Fegon, 19, stay-in waitress ng Shadows Bar na kasama ng biktima ng gabing dukutin ito, ang siyang nag-ulat sa mga awtoridad.
Ayon sa salaysay ni Fegon nagawa umano niyang makatakas mula sa mga kidnappers habang tinangay naman ng mga ito si Suzuki.
Sa kasalukuyan ay inaalam pa ng mga awtoridad kung sinong grupo ang responsable sa pagdukot sa biktima. (Ulat ni Joy Cantos)