Kidnaper/rapist na vendor ng 16-anyos, nasakote

BACOOR, Cavite – Nadakip ng pinagsanib na puwersa ng Intelligence and Investigation and Detective Group (IIDG) ng bayang ito at ng Intelligence and Investigation Division (IID) ng Las Piñas City ang isang ice cream vendor makaraang dukutin at gahasain ang isang 16-anyos na dalagita na kanyang dinala sa isang bodega ng ice cream sa Barangay Niog ng nabanggit na bayan, kamakalawa.

Nakilala ang suspect na si Rodolfo Dalida, 48, alyas Rudy , ng Laong Compound Pilar Village, Barangay Almanza, Las Pinas City.

Samantala ang biktima na itinago sa pangalang Lenlen ay nabawi ng mga awtoridad.

Batay sa isinagawang imbestigasyon ni PO2 Enrique Eusebio, may hawak ng kaso na dakong ala-1 ng hapon noong nakalipas na Nobyembre 15 nang dukutin ng suspect ang biktima at dinala sa nabanggit na lugar.

Sa loob ng mahigit na isang linggo ay may ilang ulit na ginahasa ng suspect ang biktima.

Matapos ang may ilang araw na surveillance ay natunton ng mga awtoridad ang pinagkukutaan ng suspect kung kaya inihanda ang operasyon laban dito at matagumpay namang nasagip ang biktima.

Inihahanda naman ang kaukulang kaso laban sa suspect. (Ulat ni Mading Sarmiento)