Pastor, 2 pa minasaker ng MILF rebels

Tatlo katao ang nasawi kabilang dito ang isang pastor, samantalang nasa kritikal na kondisyon ang asawa nito makaraang paulanan ng punglo ng mga sumalakay na armadong kalalakihan na hinihinalang mga rebeldeng Moro Islamic Liberation Front (MILF) ang isang simbahan at isang motorsiklo sa dalawang magkahiwalay na lugar sa lalawigan ng Sarangani at Cotabato, kamakalawa.

Batay sa ulat na nakarating kahapon sa Camp Aguinaldo, naganap ang unang karahasan dakong alas- 6 ng gabi makaraang walang habas na paulanan ng bala ng mga suspect ang Calvary Church sa bisinidad ng Sitio Aglay, Barangay Mindupok, Maitum sa bayan ng Sarangani.

Bunga nito, nasawi noon din bunga ng tinamong mga tama ng bala sa katawan ang biktimang si Pastor Amado Ferrer ng nabanggit na simbahan.

Nasa kritikal namang kondisyon ang asawa ng nabanggit na pastor na kinilalang si Nida na ngayon ay ginagamot sa Maitum Medical Center.

Ayon sa inisyal na imbestigasyon, kasalukuyang nag-aayos ng simbahan ang mag-asawa ng dumating ang mga suspect at walang habas na nagpaulan ng bala ng baril at pagkatapos ay mabilis na itong nagsitakas.

Samantala, sa Barangay Renzo, Carmen, Cotabato pinaulanan din ng mga armadong kalalakihang pinaniniwalaang mga rebeldeng MILF ang isang motorsiklo na nagresulta naman sa pagkamatay ng dalawang sibilyan.

Isa sa mga ito ay nakilala lamang sa alyas na Asytuna, habang inaalam pa ang pangalan ng isa. (Ulat ni Joy Cantos)