Ang mga biktimang kinakitaan ng sobrang pahirap sa kanilang mga katawan ay kinilala ni Superintendent Victorino Caseres, hepe ng pulisya sa bayang ito na sina Jose Alcantara, 32, tricycle driver; Michael Filipinas, 32 at ang kapatid nitong si Daniel Filipinas, 30, pawang mga residente ng Barangay San Roque, Cavite City.
Batay sa isinagawang imbestigasyon ni SPO4 Margarito Alba, may hawak ng kaso, dakong alas-6:50 ng umaga nang matagpuan ang bangkay ng tatlo na pawang nakahandusay sa kalsada ng nasabing lugar.
Ang mga nasawi ay pawang nagtamo ng mga tama ng bala ng baril sa katawan at ulo. Nakaposas din ang mga kamay nito.
Nabatid na ang tatlo ay dinukot ng hindi pa nakikilalang mga salarin sa Cavite City at sa bayang ito pinaslang at saka iniwan.
Ayon sa mga residente, dakong alas-5 ng madaling araw nang marinig nila ang sunod-sunod na putok ng ibat-ibang klase ng baril, gayunman natakot silang lumabas ng bahay kung kaya nang tumigil ito ay saka lamang nila nakita ang nakabulagtang mga bangkay ng mga biktima.
Malaki ang paniwala ng pulisya na matindi ang galit ng mga salarin, dahil na rin sa lubhang pahirap ang dinanas ng mga biktima sa kamay ng mga ito.
Narekober sa lugar na pinangyarihan ng krimen ang ibat-ibang basyo ng bala ng cal. 45 at M-16 rifle.
Patuloy pa rin ang isinasagawang imbestigasyon ukol dito.(Ulat ni Cristina Go-Timbang)