Biyuda sinaksak ng kapitbahay, patay

Away sa illegal na koneksyon ng kuryente…

MANILA, Philippines — Idineklarang dead on arrival ang isang 55-anyos biyuda nang tarakan ng kutsilyo sa dibdib ng kapitbahay na nakaalitan dahil sa iligal na koneksyon ng kuryente, sa Antipolo City, Rizal, kamakalawa ng gabi.

Kinilala ang nasawing biktima na si Susan Legita, residente ng Barangay Mambugan, Antipolo City. Habang agad na naaresto ang suspek na si alyas “Jes”, 27-anyos, kapitbahay ng biktima.

Sa ulat ng Antipolo Component City Police Station, bago naganap ang insidente alas-6:30 ng gabi ay lasing ang suspek nang magtungo sa bahay ng biktima at doon ay pinagtatadyakan ang pintuan kasabay ng mga sigaw at pagmumura.

Nang makapasok ang suspek ay nakalabas ng bahay ang nasa loob ng bahay at tanging naiwan ang biktima kaya’t sinaksak ng suspek gamit ang isang 12-pulgada ng kutsilyo.

Mismong ang mga tauhan ng nakakasakop na barangay ang umaresto at nag-turn-over sa suspek sa Police Community Precinct 1.

Nag-ugat umano ang insidente dahil sa dati nang alitan ng pamilya ng biktima at suspek hinggil sa iligal na koneksyon ng kuryente.

Nakatakdang isailalim sa inquest proceedings ang suspek sa reklamong murder.