Dating SK kagawad timbog sa holdap!
14-anyos HS stude biniktima..
MANILA, Philippines — Isang dating kagawad ng Sangguniang Kabataan (SK) ang inaresto matapos umanong mangholdap ng 14-anyos na estudyante kamakalawa ng hapon sa Brgy. San Nicolas, Bacoor City, Cavite.
Sinampahan na ng kasong robbery ang suspek na si alyas “Brando”, 19- anyos, dating SK Kagawad at residente ng Progressive 7, Brgy. San Nicolas 2, Bacoor City, Cavite.
Sa imbestigasyon ng pulisya, alas-10:00 ng umaga nang maganap ang panghoholdap sa high school student na si alyas “Jervin”, 14-anyos, residente ng Malagasang 2, Bacoor City.
Ayon sa biktima, kasalukuyan umano siyang nasa lugar upang maki-hang out sa mga kaibigan nang biglang lapitan ng suspek at agad tinutukan ng patalim saka nagdeklara ng holdap.
Mabilis na kinulimbat ng suspek sa biktima ang kanyang bag, cellphone at P500 cash bago tumakas patungo ng Brgy. San Nicolas 2 ng nasabi ring lungsod.
Agad namang humingi tulong ang biktima sa barangay at Bacoor Police at sa follow-up operation, natiyempuhan nila ang suspek sa nasabing lugar at nabawi rito ang bag at cellphone na kanyang tinagay sa biktima habang hindi na naibalik ang pera nito.
Narekober din sa suspek ang may 11 pulgadang patalim na ginamit nito sa panghoholdap.
- Latest
