Rider, kalabaw, patay sa bangga

MANILA, Philippines — Idineklarang dead on arrival sa ospital ang isang motorcycle rider nang bumangga sa isang kalabaw na namatay din sa Barangay Macpac, Catanauan, Quezon, kama­kalawa ng gabi.

Ayon sa ulat ng pulisya, bandang alas-6:30 ng gabi, minamaneho ni alyas “Kenneth,” 24, ang kanyang motorsiklo sa kahabaan ng highway nang tumawid ang isang anim na buwang gulang na kalabaw na agad nitong nabangga.

Nagtamo ng matinding kapinsalaan sa ulo ang rider kung kaya isinugod ito sa hospital subalit idineklara itong dead on arrival.    

Ayon sa pulisya, kinatay ng may-ari ang kalabaw matapos na ito ay mamatay sa aksidente.