3 ‘sister’ todas sa sunog sa Maynila

MANILA, Philippines — Tatlong magkakapatid na babae ang nasawi sa naganap na sunog sa kanilang bahay sa Sta. Mesa, Maynila, kamakalawa ng hapon.

Ang mga biktima ay kinilala lamang na sina Ashanty Kate, 7; Ashley Kaye Balaba, 9 at Sushmita Adelain, 16.

Sa ulat ng Manila Police District (MPD)-Sta. Mesa Police Station 8 (PS-8), alas-5:12 ng hapon nang sumiklab ang sunog sa naturang dalawang palapag na residential building, na matatagpuan sa Guadalcanal St., Sta. Mesa na pagmamay-ari ng isang ‘Ginalinda Reyes.’

Ayon kay Barangay Chairman Francisco Blanco, ng Barangay 597, malakas ang usok sa tahanan nang madatnan nila ngunit walang lumalabas na apoy.

Inimpormahan ­umano sila ng ina na naiwanan ang mga biktima sa loob ng bahay ngunit hindi naman nila mapasok ang tahanan dahil sa makapal na usok.

Nahirapan din umanong makapasok ang mga bumbero sa tahanan dahil kulob ito, bukod pa sa maliliit ang mga kalsada doon.

Umabot lamang naman ang sunog sa unang alarma bago tuluyang naideklarang fire out dakong alas-5:58 ng gabi.

Masusi pang iniimbestigahan ng mga otoridad ang pinagmulan ng apoy na tumupok sa tinatayang P30,000 halaga ng ari-arian.