Banggaan ng modern jeep at tricycle: 2 patay, 20 sugatan

MANILA, Philippines — Patay ang dalawang katao habang nasa 20 ang sugatan matapos magsalpukan ang modern jeep at isang tricycle hanggang sa tuluyan itong mahulog sa tulay sa Brgy. Iba O Este, Calumpit, Bulacan, kamakalawa ng hapon.

Kinilala ng pulisya ang nasawi na sina ­Johnny Reyes, 44, tricycle ­driver ng Brgy. Caniogan at pasaherong si Angelica Esguerra, 27 ng North Ville-9, Brgy. Iba O Este.

Nasa 20 katao ang naitalang nasugatan sa naturang aksidente na ang karamihan ay pawang mga estudyante ng Bulacan State University.

Sa report, nangyari ang insidente, ala-1:40 ng hapon nitong Martes sa kahabaan ng Mc Arthur Highway sakop ng Brgy. Iba O Este.

Sa inisyal na imbestigasyon, nawalan ng preno ang modern jeep na ga­ling Malolos patungong Apalit hanggang sa kabigin ng driver ang mani­bela pakaliwa upang hindi mabangga ang mga kasunod na sasakyan subalit sinalpok ang kasalubong na tricycle at tuluyang nahulog ito sa tulay.

Ang driver ng mo­dern jeep na nakilalang si Orlando Manayag Jr, 53 ng Sto. Tomas, Pampanga ay nasa kustodiya ng pulisya at nahaharap sa kaukulang kaso.