TRABAHO Partylist, suportado ang isusulong na job security at creation sa FTA ng Pinas at SoKor
MANILA, Philippines — Inanunsyo ng TRABAHO Partylist ang kanilang suporta sa nalalapit na Free Trade Agreement (FTA) sa pagitan ng Pilipinas at South Korea.
Ang partido, na kilala sa pagsusulong ng mga karapatan ng mga manggagawa, paglikha ng trabaho, at repormang pang-ekonomiya, ay tinitingnan ang FTA bilang isang mahalagang hakbang para sa pagpapalago ng mga trabaho, pagpapalawak ng kalakalan, at pagpapabuti ng mga kondisyon sa paggawa sa bansa.
Ayon kay Atty. Mitchell-David L. Espiritu, tagapagsalita ng TRABAHO Partylist, positibo silang naniniwala na magdudulot ng maraming benepisyo ang kasunduan para sa mga manggagawang Pilipino at mga negosyo, lalo na sa sektor ng pagmamanupaktura, agrikultura, at mga serbisyo.
Layunin ng FTA na alisin ang mga taripa at itaguyod ang bilateral na kalakalan sa pagitan ng dalawang bansa, na magpapalakas sa mga eksport ng Pilipinas at maghihikayat ng mas maraming foreign investments.
Binanggit ni Atty. Espiritu ang kahalagahan ng pagtitiyak na ang FTA ay magkakaroon ng mga safeguard upang matiyak na hindi lamang ang sektor ng negosyo ang makikinabang, kundi pati na rin ang mga manggagawang Pilipino sa pamamagitan ng paglikha ng de-kalidad na trabaho.
Kasama sa mga hakbang na ito ang pagtutok sa pagsunod sa mga pamantayan sa paggawa at ang pagsisiguro na hindi ito magdudulot ng displacement ng mga trabaho o hindi magandang kondisyon sa trabaho.
Ayon pa sa TRABAHO Partylist, may malaking potensyal ang Pilipinas na magkaroon ng mas maraming access sa mga makabagong teknolohiya mula sa South Korea.
- Latest
