3 arestado sa pagpatay sa 2 sales agent sa Batangas
MANILA, Philippines — Tatlong lalaki na pangunahing suspek pagpatay sa dalawang ahente na ang mga bangkay ay itinapon malapit sa isang bahay sa Agoncillo, nitong Martes ang naaresto ng mga otoridad.
Itinuturing ni P/Major Broderick Noprada, hepe ng Agoncillo police, na sarado na ang kasong pagpatay sa mga biktimang sina Eugene Petil, 37, at James Clerk Sultero, 18, kapwa sales agent ng animal seed feeds nang maaresto ang mga suspek na sina Guillermo Endozo, 32, mastermind; Jojo Sangalang, 35, na tinaguriang gunmen; at Jayson Endozo, 42, pinsan ni Guillermo.
Ang tatlo ay naaresto ng tracker team operatives sa kani-kanilang bahay na matatagpuan sa Laurel at Agoncillo nitong Miyerkules ng hapon.
Ayon kay Noprada, ang magpinsan na sina Endozos at Sangalang ay positibong kinilala ng mga nakasaksi bilang mga salarin sa pagpatay kay Petil at Sultero.
Lumalabas na target lang na patayin si Petil dahil sa may malaking utang ang mastermind na si Guillermo na hindi nito kayang bayaran at nadamay lang si Sultero.
Magugunita na natagpuan ang bangkay nina Petil at Sultero na may tama ng bala sa ulo at katawan sa harap ng isang kubo sa Barangay Banyaga, Agoncillo, Batangas nitong Martes ng alas-4:20 ng hapon.
- Latest
