2 lalaki tinadtad ng bala ang katawan

Bangkay itinapon…

MANILA, Philippines — Dalawang bangkay ng lalaki na tadtad ng bala ang ulo at katawan ang natagpuan sa tapat ng isang kubo sa Brgy. Banyaga, Agoncillo, Batangas, kamakalawa.

Inilarawan ng pulisya ang suot ng isang bangkay ng lalaki na naka-orange na kamiseta, brown at itim na short at pulang tsinelas habang ang isa ay nakasuot ng berdeng kamiseta, itim na pants at puting sapatos.

Batay sa nakalap na ulat, alas-4:20 ng hapon nang matagpuan ang bangkay ng dalawa na nakahandusay sa tapat ng isang kubo sa nasabing lugar na kapwa duguan ang mga ulo at katawan dahil sa mga tama ng bala. Narekober sa lugar ang 1 fired cartridge case ng .45 Caliber at 1 unit ng cellphone.

Nakarekober din ang pulisya ng isang abandonang puting Toyota Hilux HSPU na may plakang NDQ1809 at nakarehistro sa isang Sherwin Reyes Ramos na nakatira sa 33 Purok Maginhawa, Bagong Sikat, Muñoz, Nueva Ecija.

Inaalam ng pulisya kung may kinalaman ang natagpuang sasakyan sa mga biktima.