VP Sara kay Pangulong Marcos: Hindi marunong maging Presidente

MANILA, Philippines — Inakusahan kahapon ni Vice President Sara Duterte si Pangulong Ferdinand “Bongbong” Marcos Jr. na walang alam kung paano umano pangasiwaan ang bansa.

“Hindi ko kasalanan that we’re on this road to hell, hindi marunong maging Presidente ang nakaupo,” pahayag ni Duterte sa isang press conference sa Mandaluyong City na dahilan umano niya kaya’t siya nagbitiw bilang kalihim ng Department of Education (DepEd).

“Kaya ako umalis sa administration, ‘di ba? Hindi ko na gusto yung mga naririnig ko dun, yung mga nakikita ko dun,” dagdag nito.

Ayon pa kay Duterte na kung siya ang tatanungin na ang bansa ay walang “Number One.”

“Kung presidente ninyo siya, okay lang. Ako, hanggang Number Two lang itong bansa na ito, wala itong Number 1 para sa akin,” wika ni Duterte.

Nang tanungin ng media kung i-rate niya ang performance ni Marcos bilang chief executive mula 1 to 10 na ang 10 ang pinakamataas ay sinabi ni Duterte na bibigyan niya ito ng 1 dahil wala naman umanong plano si Marcos tungkol sa food security at inflation.

“I don’t ever remember may plataporma siya. I don’t ever remember him discussing kung anong gagawin sa problema ngayon,” wika ni Duterte.

“Nagkakausap lang kami dahil sa trabaho, hindi naman lahat ng katrabaho natin kaibigan natin, di ba?” pagbibigay nito ng diin nang tanungin ang pagiging magkaibigan nila ng Marcos.

Tumanggi ang Malacañang na magkomento sa mga naging pahayag ng Vice President.