Alice Guo ihahalo na sa selda 3 ng Pasig Jail

Nagnegatibo sa TB

MANILA, Philippines — Ihahalo na sa ibang bilanggo si dating Bamban, Tarlac Mayor Alice Guo matapos na negatibo sa tuberculosis batay resulta ng Gene Xpert lab test kahapon sa Pasig City Jail.

Ginawa ang pagsusuri matapos lumabas sa laboratory test ng Philippine National Police na posibleng may infection sa kaliwang baga si Guo.

Sa confirmatory test, negatibo sa sakit si Guo kaya’t ihahalo na siya sa Selda No. 3 na may 43 iba pang bilanggo.

Kahapon ng umaga ay nailipat na si Guo sa Pasig City Jail Female Dormitory mula sa PNP Custodial Center sa Camp Crame, Quezon City.

Samantala, agad na binawi ng Pasig RTC ang kautusan kahapon na nagpapahinto na mailipat sa kustodiya ng Pasig City Jail dahil sa natuloy na ang paglipat bago pa inilabas ang desisyon sa Very Urgent Motion na inihain noong Sabado.

Sa tatlong pahinang kautusan ni Presiding Judge Annielyn Cabelis ng Pasig RTC Branch 167, isinantabi ang kautusang “to hold in abeyance the transfer of the custody” ni Guo at kasabay nito ay hindi na rin matutuloy ang itinakdang hearing sa Setyembre 17, kung saan pinagdadalo ang Criminal Investigation and Detection Group (CIDG) na naghain naman laban kay Guo ng Qualified Human Trafficking.