Chinese, misis na Pinay na dinukot sa Metro Manila, na-rescue sa Batangas
MANILA, Philippines — Nasagip ng mga awtoridad sa Laurel, Batangas ang isang Chinese at misis nitong Pinay na dinukot sa Metro Manila.
Ayon sa inisyal na report, pasado alas-3:00 ng madaling araw ng Biyernes nang makarating sa isang animal quarantine checkpoint sa Diokno highway, sa Brgy San Gregorio, Laurel, Batangas ang mga biktimang sina alyas Shi, 36 at Pinay na misis na si Alyas Milagros, mga residente ng Sto. Niño, Parañaque City.
Humihingi ang mga ito ng tulong matapos na pakawalan sila ng mga hindi nakilalang kidnapper na dumukot sa kanila.
Ayon sa mag-asawa, kinuha sila ng mga hindi nakilalang mga kalalakihan sa kanilang bahay sa Parañaque City at isinakay sa isang hindi matukoy na kulay silver na sasakyan at ibiniyahe sa hindi nila alam na lugar.
Lumalabas sa imbestigasyon na inabandona ng mga kidnaper ang dalawa sa may boundary ng mga bayan ng Calaca at Laurel sa Batangas.
Hindi naman sinabi ng mga ito kung bakit sila pinakawalan ng mga kidnaper.
- Latest
