Babae na kasama dinamay dalaga tinodas ng ex-lover na parak
MANILA, Philippines — Isang 25-anyos na dalaga at kanyang kasama na babae ang nasawi nang pagbabarilin sila ng dating karelasyong pulis habang kumakain sa isang bar, nitong Lunes ng umaga sa Bislig City, Surigao del Sur.
Ang mga nasawi ay kinilalang sina Janeth Catarman Besa, 25, residente ng Brgy. San Vicente; at Karyl Mae Abanggan, 21, ng Brgy. Tumanan ng nasabing bayan.
Agad naaresto ang suspek na kinilalang si Police Master Sergeant Kenneth Viola Cacho, taga-Barangay Poblacion, Cateel Davao Oriental at kasapi ng Provincial Drug Enforcement Unit Davao Oriental Provincial Police Office na dating karelasyon ni Besa.
Sa ulat ng Bislig City Police Office, naganap ang krimen, alas-11:20 ng gabi nitong Lunes sa isang bar na matatagpuan sa Purok 3, Bongaitan District, Mangagoy Bislig City.
Sa pagsisiyasat ng pulisya, nakipaghiwalay si Besa kay Cacho nang malaman na ito ay mayroon ng asawa hanggang sa nagkrus ang kanilang landas sa nasabing lugar.
Habang kumakain ang mga biktima, nilapitan sila ni Cacho at kinausap si Besa na nauwi sa mainitang pagtatalo hanggang sa bumunot ito ng baril at pinagbabaril ang dalawa.
Nagtamo ng mga tama ng bala sa iba’t ibang parte ng katawan ang mga biktima na naging sanhi ng agaran nilang kamatayan.
Matapos ang krimen, tinangkang tumakas ng suspek na kalaunan ay nadakip ng mga tauhan ng Bislig-PNP at Police Regional Office-13.
- Latest
