Alice Guo naaresto na sa Indonesia

MANILA, Philippines — Nadakip na umano ang dinismis na mayor ng Bamban, Tarlac na si Alice Guo.

Batay sa ulat, si Alice ay naaresto sa Jakarta, Indonesia nitong mada­ling araw ng Miyerkules.

Nagpalabas na rin ng pahayag ang Department of Justice (DOJ) sa pagkakaaresto kay Guo.

“The arrest of Alice Guo is a testament to the tireless efforts of our law enforcement agencies and the strength of international cooperation in bringing fugitives to justice,” ayon sa statement ni DOJ Secretary Jesus Crispin C. Remulla.

Makikipagkoordinasyon umano ang DOJ sa Indonesian authorities para agad maayos ang mga kinakailangang legal procedures.

Kaugnay nito, sa mensaheng ipinarating sa mga mamamahayag, ipinabatid din ni Sen. Sherwin Gatchalian na nahuli si Guo sa Tangerang City, Jakarta, Indonesia.

“I was just inform by the NBI that Guo Hua Ping (also known as ­Alice Guo), was arrested in Tangerang City, Jakarta, Indonesia, at 01:30 on September 4, 2024.

“She is currently in the custody of the Indonesian Police at Jatanras Mabes Polri,” ayon sa senador.

Kinumpirma na rin umano ito ng Presidential Anti-Organized Crime Commission (PAOCC).

Samantala, sinabi naman ni Pangulong Ferdinand “Bongbong” Marcos Jr. na sisibakin at sasampahan ng kaso ang mga taong tumulong para makalabas ng Pilipinas si Guo.

Ayon kay Marcos, lahat ng tumulong kay Guo para ilegal na makalabas ng bansa ay tiyak na mananagot sa batas at hindi lang sila sisibakin kung hindi kakasuhan pa dahil labag sa batas ang ginawa nila.

Sa tanong na kung sinu-sino ang mga ito, sagot ni Marcos “you’ll find out soon”.