Lalaki pinatay sa away sa parking

MANILA, Philippines — Isang 27-anyos na lalaki ang nasawi noon din matapos na barilin ng isa sa tatlong barker na nakatalo nito sa parking area sa Brgy. Cupang, Antipolo City, Rizal, kamakalawa.

Ang biktima na nasawi noon din dahil sa mga tama ng bala sa iba’t ibang bahagi ng katawan ay nakilalang si John Kenneth Figueroa, residente ng  Dimsun Compound.

Isa sa tatlong suspek ay nakilalang si alias Totoy ay mabilis  na tumakas at tinutugis na sila ng pulisya.

Sa imbestigasyon ng pulisya, bago naganap ang krimen, ala-1:10 ng hapon noong Sabado sa Dimsun Compound, Purok 2, sa Brgy. Cupang ay unang nagkaroon ng alitan ang biktima at tatlong suspek nang iparada ng biktima ang bagong sasakyan sa kahabaan ng nasabing kalsada.

Kinompronta ng isa sa tatlong suspek na barker ang pagpaparada ng biktima na nauwi sa mainitang pagtatalo hanggang sa ito ay naawat.

Nang naglalakad ang biktima pauwi sa kanilang bahay ay sinundan ito ng tatlong suspek at isa dito ay naghamon ng suntukan.

Nakita sa CCTV na nakalagay sa lugar na kung saan ay natalo ng biktima sa suntukan ang isa sa tatlong suspek ay binunot ang baril na caliber .45 gun sa kanyang bewang at pinagbabaril ang biktima.