Pagsipsip ng langis mula sa lumubog na motor tanker sa Bataan, sinimulan na ng PCG
MANILA, Philippines — Nag-umpisa na kahapon ang Philippine Coast Guard (PCG) sa pagsipsip sa industrial fuel oil na lulan ng lumubog na motor tanker sa Limay, Bataan.
Ayon kay PCG spokesperson Rear Admiral Armand Balilo, maaaring tumagal ang naturang operasyon sa loob ng isang linggo.
Sinabi ni Balilo na ang pagkuha ng langis mula sa lumubog na MT Terra Nova ang pinakamabisang paraan upang maiwasan ang oil spill sa Manila Bay.
Una nang nilagyan ng PCG ng dispersants at booms ang lugar kung saan lumubog ang motor tanker upang mapigilan ang oil spill.
Nilinaw naman ni Balilo na kakaunti lamang ang tumatagas na langis dahil buo naman aniya ang tangke na pinaglalagyan nito.
Matatandaang lumubog ang MT Terra Nova sa Limay, Bataan kamakailan na nagresulta sa pagkasawi ng isang tripulante nito.
- Latest
