Bangkay ng lalaki, lumutang sa ilog Pasig

MANILA, Philippines — Isang bangkay ng hindi kilalang lalaki ang natagpuan na palutang-lutang sa Ilog Pasig sa Binondo, Maynila kamakalawa ng umaga.

Inilarawan ng Manila Police District (MPD) -Police Station 12, ang biktima na nasa edad 30-40-anyos, malaki ang pangangatawan, may taas na 5’5” hanggang 5’8”, nakasuot ng gray na t-shirt na nakapaloob sa isang kulay berde na long sleeve na may nakatatak na “Toyu Construction.”

 Nabatid na, alas-5:57 ng umaga nang madiskubre ng Philippine Coast Guard (PCG) personnel na si PO3 Jerome Rivera, ang bangkay na palutang-lutang sa ilog, malapit sa Coast Guard Compound, Parola Base, Binondo.

Nagsasagawa ng imbestigasyon ang mga otoridad upang matukoy ang pagkakilanlan ng biktima, gayundin ang sanhi ng pagkamatay nito.