Kelot na sangkot sa iligal na koneksyon ng tubig, tinodas

MANILA, Philippines — Tuluyang hindi na nagising ang isang 25-anyos na lalaki na binaril habang natutulog sa loob ng pedicab ng hindi pa kilalang mga suspek, kahapon sa Baseco, Port Area, Maynila.

Kinilala ang biktimang si Primo Galla, residente ng Block 5 Extension, Barangay 649, Baseco.

Inilarawan ang dalawang lalaking suspek na ang isa ay nakasuot ng bull cap, itim na long sleeve shirt, pula ang short pants at naka-tsinelas habang ang isa pa ay nakasuot din ng bull cap, itim na t-shirt, itim na pantalon, at tsinelas.

Sa ulat ng pulisya, ala-1:43 ng madaling araw nitong Huwebes nang barilin ang biktima habang natutulog sa nakaparadang pedicab sa Blk. 5 Extension, malapit sa AMA Dome, Baseco.

Matapos isagawa ang krimen ay kaswal lang naglakad ang dalawang suspek na agad naman iniualt ng mga tambay sa barangay na ipinabatid agad sa MPD-Police Station 13.

Sa inisyal na imbestigasyon, posibleng may kaugnayan sa ginagawang iligal na pagta-tap ng koneksyon ng tubig ng biktima ang dahilan sa krimen.