Higit 22K pulis ipapakalat sa ikatlong SONA ni Pangulong Marcos
Seguridad kasado na
MANILA, Philippines — Inihayag ni NCRPO Director, PMGen. Jose Melencio Nartatez Jr., na aabot sa mahigit 22 libong pulis at force multipliers ang ipakakalat para sa ikatlong State of the Nation Address ni Pangulong Ferdinand R. Marcos Jr.
Kasabay din ng paglikha ng Security Task Force SONA 2024 para tiyakin ang seguridad at kaligtasan sa nabanggit na okasyon.
Mula sa nasabing bilang, sinabi ni Nartatez na halos 18 libong mga pulis ang magmumula sa NCRPO, halos 2 libong pulis ang mula naman sa karatig na Regional Office gaya ng Central Luzon at CALABARZON.
Habang nasa mahigit 2,700 naman ang magsisilbing force multipler o buhat sa iba pang ahensya gaya ng MMDA, Coast Guard, BFP, BJMP at mga lokal na pamahalaan.
May ipakakalat din na Medical Assistance desk sa mga lugar na pagdarausan ng mga pagtitipon gayundin ang help desk na ilalagay sa areas of convergence.
Maliban sa mga lugar malapit sa Batasang Pambansa ay may ipakakalat din mga pulis partikular na sa EDSA Shrine sa Quezon City at Mendiola sa Maynila na siyang posibleng pagdausan ng mga pagkilos.
- Latest
