Pagpapadala ng China ng ‘monster ship’ sa Ayungin Shoal, illegal - AFP
MANILA, Philippines — Maituturing na Ilegal ang pagpapadala ng China Coast Guard (CCG) ng “monster ship” malapit sa Ayungin Shoal sa West Philippine Sea (WPS) dahilan laban ito sa pagpapanatili ng kapayapaan at katatagan sa rehiyon.
Sinabi ni Col. Xerxes Trinidad, Chief ng AFP Public Affairs Office na nanatili ang mandato ng AFP sa pagiging vigilante sa misyong panatilihin ang internasyonal ‘maritime laws’ kaugnay ng mga aktibidad ng China na patuloy sa pagiging agresibo sa WPS.
Ginawa ni Trinidad ang pahayag kasunod naman ng namonitor na presensya ng “monster ship” o pinakamalaking barko ng China Coast Guard (CCG) na dumaan sa malapit sa BRP Sierra Madre sa Ayungin Shoal kamakalawa.
Ang China Coast Guard (CCG) ay patuloy sa paninindak at pagiging agresibo sa West Philippine Sea (WPS) kaugnay ng illegal na pag-aangkin sa malaking bahagi ng nasabing teritoryo.
“The presence of this 12,000-ton CCG ship near BRP Sierra Madre is part of a broader pattern of intrusive patrols aimed at asserting unlawful claims over areas within the Philippines’ exclusive economic zone (EEZ),” pahayag ni Trinidad.
Binigyang diin ni Trinidad na ipinatutupad ng AFP na walang pasubali ang international maritime law partikular na ang United Nations Convention on the Law of the Sea (UNCLOS).
Kaugnay nito, sa monitoring ng Philippine Navy nasa 129 namang barko ng CCG at mga Chinese militia ang namonitor sa WPS mula Hunyo 18-24. Nabatid na kabilang dito ay 15 vessels sa Bajo de Masinloc, 34 sa Ayungin Shoal , 34 sa Pag-asa Island at nasa 25 naman sa bahagi ng Recto Bank.
- Latest
