20-anyos inaresto sa ‘sextortion’

MANILA, Philippines — Naaresto ng mga otoridad sa isang entrapment operation ang 20-anyos na lalaki matapos ireklamo ng “sextortion” ng  kanyang naging kliyente sa Quezon City, kahapon ng umaga.

Kinilala ang suspek na si Ian Patrick Bautista, residente ng No. 436 Francisco St.,Tondo, Maynila  matapos na positibong itinuro ng  35-anyos na  biktima.

Bago ang entrapment operation, alas-11:20 ng umaga ay unang nagkakilala ang biktima at suspek  sa isang  Dating Up noong Disyembre 16, 2023 hanggang sa magkapalagayan ng   loob at nagkasundo na magkita sa Rosas Inn sa  Muñoz, QC.

Lingid sa kaalaman ng biktima, nire-record na siya ng  suspek habang hubo’t hubad at doon na nagsimulang manakot at  manghingi ng  pera.

Dala ng  takot, nagbigay ang biktima ng  P35,000  sa pamamagitan ng   GCash hanggang sa maulit ang  panghihingi ng  suspek sa bantang ikakalat ang mga larawan nito.

Kaya’t humingi ng tulong ang biktima  sa pulisya at isinagawa ang  entrapment operation at nakipagkasundo na muling magbibigay ng  pera para tuluyan nang burahin ang mga larawan at  video.

Ikinasa  ang entrapment operation sa harap ng isang  condominium sa Bago Bantay at dito naaresto ang  suspek na nahaharap sa kasong paglabag sa Article 294 (Sextortion),  Article 286 (Grave Coercion) ng RPC at RA 11313 (Safe Spaces Act) all in relation to Section 6 ng RA 10175  o mas kilalang “Cybercrime Prevention Act of 2012.