Maynila, Laguna binulabog ng bomb threat

MANILA, Philippines — Nakatanggap ng pananakot sa pamamagitan ng bomb threat ang limang tanggapan ng pamahalaan sa Maynila at isang paaralan sa Laguna.

Ito ang kinumpirma ng Philippine National Police (PNP) mula sa kumakalat na email ng isang Takahiro Karasawa na isang abogado umano na buhat pa sa Japan.

Kabilang sa mga pinadalhan ng naturang email ay ang mga tanggapan ng pamahalaan ng Department of Budget and Management (DBM), National Economic and Development Authority (NEDA), Department of Labor and Employment (DOLE).

Gayundin ang National Museum of the Philippines, National Police Commission (NAPOLCOM), at ang Pangil Elementary School sa Laguna.

Ngunit ayon kay PNP Public Information Office Chief, Police Col. Jean Fajardo, pawang negatibo ang impormasyon sa mga naturang tanggapan matapos ang isinagawang imbestigasyon.

Sinabi ni Fajardo, hindi ito ang unang pagkakataon na ginamit ang naturang pangalan dahil may kumalat na ring katulad na email noong buwan ng Setyembre at Oktubre.

Sa kabila nito, sinabi ni Fajardo na hindi pa rin pakakampante ang PNP lalo pa’t mainit pa ang usapin ng pagpapasabog sa Mindanao State University sa Marawi City.

Apela ng PNP sa publiko, iwasang ikalat ang mga ganitong impormasyon sa social media sa halip ay mas makabubu­ting ipagbigay-alam muna ito sa mga otoridad upang agad maaksyunan.