P3 bilyong budget sa fuel subsidy aprub na

MANILA, Philippines — Inaprubahan na ng Department of Budget and Management (DBM) ang pagpapalabas ng P3 bilyon para sa pagpapatupad ng fuel subsidy sa transport sector na apektado ng pagtaas ng presyo ng gasolina.

Ayon kay Budget Secretary Amenah F. Pangandaman, ang fuel subsidy ay naglalayong mag-alok ng tulong sa humigit-kumulang 1.3 milyong driver at operator na naapektuhan ng sunud-sunod na pagtaas ng presyo ng langis.

Sa kahilingan ng Department of Transportation (DOTr), P3 bilyong pondo ang inilabas alinsunod sa Republic Act No. 11936, na kilala rin bilang fiscal year 2023 General Appropriations Act.

Ang LTFRB, sa paki­kipag-ugnayan sa Department of Interior and Local Government (DILG), De­partment of Information and Communications Technology (DICT), at Department of Trade and Industry (DTI), ay natukoy at na-validate ang 1.3 mil­yong target na benepisyaryo ng subsidy sa gasolina.

Ayon sa DBM, ang mga benepisyaryo na ito ay makakatanggap ng isang beses na subsidy sa gasolina, na may iba’t ibang mga rate batay sa naaangkop na pa­raan ng transportasyon.

Para sa Modernized Public Utility Jeepney (MPUJ) at Modernized Utility Vehicle Express (MUVE), ang halaga ng subsidy ay P10,000; Traditional Public Utility Jeepney (PUJ), Traditional Utility Vehicle Express (UVE), Public Utility Bus (PUB), Minibus, Taxis, Shuttle Services Taxis, Transport Network Vehicle Services, Tourist Transport Services, School Transport Services, at Filcab ay kwalipikado para sa isang subsidy na P6,500.

Ang mga tricycle ay tumatanggap ng subsidy na P1,000, habang ang Delivery Services ay may karapatan sa subsidy na P1,200.