11-buwang gulang sanggol nahulog sa balon, nalunod

MANILA, Philippines — Patay na nang matagpuan ng ina ang kanyang 11 buwang gulang na sanggol matapos itong mahulog at malunod sa isang balon na malapit sa kanilang bahay sa Brgy. Tres Cruses, Tanza, Cavite.

Kinilala ang sanggol na si Sarah Mae Baranda, residente ng nasabing lugar.

Sa ulat ng pulisya, bago nadiskubre ang bangkay ng sanggol, alas-11:00 ng umaga magkakasama sa loob ng bahay ang mag-iina kabilang ang sanggol na noon ay nakahiga  at kapatid nitong 5 taong gulang.

Ayon sa ina ng biktima na si Mergielyn Peregrino, iniwan umano niya ang dalawang anak hinggil sa bibili lamang umano ito ng kanilang pagkain sa tindahan na lingid sa kanyang kaalaman ay sumunod sa kanya ang 5 taong gulang na anak kung kaya naiwang mag-isa ang sanggol.

Agad naman umano silang bumalik pagkabili ng pagkain, subalit pagpasok sa bahay ay wala na sa higaan ang sanggol.

Agad nila itong hinanap hanggang sa matagpuan itong nakalutang sa balon, kaya’t mabilis na dinala sa ospital, subalit idineklarang dead-on-arrival.