Daloy ng lava ng Mayon umabot na sa 2.5 kilometro

MANILA, Philippines — Inihayag kahapon ng Philippine Institute of Volcanology and Seismology (PHIVOLCS) na umaabot na sa 2.5 kilometro ang haba ng lava flow mula sa Bulkang Mayon sa Mi-isi Gully at 1.8 kilometro sa Bonga Gully sa nakalipas na 24 oras.

Habang nasa 3.3 kilometro naman ang pagguho ng lava mula sa bulkan.

Ayon pa sa Phivolcs, isang volcanic earthquake at 301 na rockfall events at dalawang pyroclastic density current events ang naitala at nasa 389 tonelada ng asupre naman ang ibinuga ng bulkan.

Nasa 800 metrong taas ng plume naman ang ibinuga ng bulkan na napadpad sa timog-kanluran at kanluran-timog-kanluran.

Nanatili pa rin sa Alert Level 3 ang bulkan at patuloy pa ring pinagbabawal ang pagpasok ninuman sa loob ng 4 kilometer danger zone at paglipad ng aircraft sa ibabaw ng bulkan.