2 High School student nilamon ng ilog

MANILA, Philippines — Kapwa patay na nang matagpuan ang magkaklaseng Junior High School student matapos malunod sa malalim na bahagi ng Cagayan River sa Simayung, Abulug, Cagayan.

Magkasunod na narekober ang katawan ng dalawang biktima na sina Jakevie Balanza at Aldrin Pabalan, kapwa 15-anyos at grade 10 student ng Libertad National High School sa nasabing bayan.

Una rito, nagtungo sa ilog ang dalawa upang maligo kasama ang isa pa nilang kaklase na si Julius Galano, 16-anyos.

Palusong pa lamang umano sina Julius at Aldrin nang mapansin na iba ang galaw ng tubig kaya’t dali-daling umahon ang mga ito.

Napansin naman ni Jakevie na nahihirapan umano sina Julius at Aldrin kaya kumuha ito ng kawayan para may makapitan ang dalawa pero habang tinutulungan ni Jakevie si Aldrin ay nahulog ito sa tubig dahilan naman ng kanyang pagkalunod.

Tanging si Julius lamang ang nakaligtas sa nangyaring trahedya.

Nabatid na halos 150 metro ang layo mula sa pinangyarihan ng insidente sa bahagi kung saan narekober ang katawan ng dalawang estudyante, alas-7:00 ng umaga nitong Hunyo 4.