Hepe ng pulisya, utas sa 10-wheeler truck
MANILA, Philippines — Isang hepe ng pulisya sa isang bayan sa lalawigan ng Batangas ang idineklarang dead-on-arrival nang aksidente bumangga ang sinasakyan nito sa isang ten wheeler truck na may kargang mga asin, kahapon ng madaling araw sa kahabaan ng Barangay Tulo, Taal ng lalawigang ito.
Kinilala ang nasawi na si P/Major Amiel Bernardo Sanhi Jr., Chief of Police ng Lian Police Station, naninirahan sa Calicanto, Batangas City na nagtamo ng maraming sugat sa iba’t ibang bahagi ng katawan.
Habang ang truck driver na si Salvador Segfred, 29, ay nasa kustodiya na ng Taal police station matapos na itong sumuko.
Sa pagsisiyasat ni P/Staff Sergeant Felix Cantero, ng Taal police station, alas-12:50 ng madaling araw ay minamaneho ng biktima ang kanyang Isuzu Max (AVA-7245) at binabaybay ang kahabaan ng highway sakop ng Brgy. Tulo pauwi na mula sa kanyang trabaho nang sumalpok ito sa kanang bahagi ng isang 10-wheeler truck (ABK-1711) na minamaneho ni Segfred na galing ng Laguna.
Ayon kay Cantero na madilim ang lugar dahil sa kawalan ng mga street lights at dagdag pa dito na basa ang kalsada dahil sa walang tigil na buhos ng ulan.
- Latest
