DILG aprub sa pag-‘todas’ sa ‘todos’ ngayong taon

MANILA, Philippines — Sinang-ayunan ni Interior Secretary Eduardo Año ang mga desisyon ng ilang lokal na pamahalaan na ipasara ang lahat ng mga pribado at pampublikong libingan sa panahon ng Todos los Santos ngayon taon dahil sa pandemiya.

Sinabi ni Año hinihikayat talaga nila ang pagsasara ng mga sementeryo para maiwasan ang pagtitipon ng mga tao.

Katuwiran ng kalihim, ang layon lang ng naman ng Todos los Santos ay bumisita sa mga puntod at aniya maari naman itong gawin sa ibang araw.

“Just imagine the scenario where millions of people will flock to cemeteries for that,” ani Año.

Ngunit ayon sa opisyal hindi pa lahat ng alkalde ay nagkasundo sa pagsasara ng mga libingan ngunit inaasahan na matatalakay ang isyu sa pagpupulong ng Metro Manila Council sa darating na araw ng Linggo.

Dagdag pa ni Año may iba pang paraan sa paggunita sa tradisyon tuwing Nobyembre 1 at 2 at isa na dito aniya ang pagdarasal na lang sa bahay.

Sinabi pa nito na maaring magkaroon ng malawakang hawaan sa mga sementeryo dahil milyon-milyon ang dumadagsa sa mga libingan tuwing Oktubre 31 hanggang Nobyembre 2.