DILG Usec. Densing positibo sa COVID-19

MANILA, Philippines — Inamin kahapon ni Department of the Interior and Local Government (DILG) Undersecretary for Operations Epimaco Densing III na positibo siya sa nakamamatay na coronavirus disease 2019 (COVID-19).

Sa kanyang Facebook post, sinabi ni Densing na nagpasya siyang ipabatid sa publiko ang kanyang kalagayan bilang bahagi ng obligasyon nito bilang public official sa ilalim ng public health emergency.

Ayon kay Densing, noong nakaraang Hunyo 27 ay nagkaroon siya ng lagnat at ubo kaya’t hindi na siya nakadalo ng kanilang pulong dahil sa masamang pakiramdam.

Kaagad aniya siyang nagpasailalim sa COVID-19 testing at natukoy ang positibong resulta ng pagsusuri nito lamang Sabado (Hulyo 4) ng umaga. Kasalukuyan na aniya siyang nasa pagamutan at maayos naman ang tugon ng kanyang katawan sa mga gamot na ibinibigay sa kanya.

Sa kabila nito, kumpiyansa naman si Densing na gagaling siya kaagad at makakarekober mula sa virus at malalampasan ang bagong hamon na kanyang kinakaharap.