Makati sex den ni-raid: 31 kababaihan, nasagip
MANILA, Philippines — Isa na namang sex den sa Makati City na pinatatakbo umano ng mga Chinese ang sinalakay ng mga otoridad na nagresulta sa pagkakasagip sa 20 dayuhang babae at 11 Pinay na massage therapist, kamakalawa ng gabi.
Sa ulat, alas-10:50 ng gabi nang salakayin ng mga pulis katuwang ang Makati City Social Welfare Division at mga kinatawan ng Department of Labor and Employment (DOLE) ang 88 Hotel sa may Guerrero Street, Brgy.Poblacion.
Naabutan ng mga operatiba ang 18 babaeng Chinese, isang Koreana at isang Vietnamese na sinasabing mga inilalako ng sindikato.
Sa isa pang palapag ng gusali, 11 Pilipina naman na umaaktong mga massage therapists ang nailigtas. Habang inaresto naman ang 8 Chinese kustomer.
Nabatid na isinasagawa ang transaksyon sa pamamagitan ng online booking at kinakailangan na may Chinese na sponsor ang isang kustomer kung hindi siya Tsino.
Umaabot sa P15,000 ang bayad sa isang sex package.
- Latest
