Foreign investment apektado
Sa pagrepaso ng gobyerno sa water concession deals...
MANILA, Philippines — Inihayag ng Management Association of the Philippines (MAP) na nanganganib na maapektuhan at bumaba pa ang foreign direct investments (FDIs) sa bansa sa ginagawang pagrepaso ng pamahalaan sa mga kontrata ng water concessionaires Manila Water at Maynilad.
Sa isinagawang ika-71 inaugural meeting ng MAP, kamakailan ay sinabi ng bagong pangulo ng grupo na si Francis Lim na ang hakbang ng gobyerno sa pagrepaso sa water concession agreements ay may epekto sa kasalukuyang pagtingin sa Pilipinas bilang investment destination.
Batay sa Fitch Solutions, ang bansa ang may pinakamataas na ‘regulatory risk’ sa kasalukuyan kaya’t ang FDIs ng bansa ay bumababa mula $10.3 bilyon noong 2017 ay bumagsak ito sa $9.8 bilyon noong 2018.
Ang FDIs ng bansa ay maliit din umano kumpara sa ibang bansa sa Southeast Asia tulad ng Vietnam na may $20.4 bilyon at Indonesia na may $24 bilyon noong nakaraang taon.
“Unless we in the Philippines shape up, foreign investors will view us as an unworthy investment destination and they might rather put their money in our Asean (Association of Southeast Asian Nations) neighbors”, wika ni Lim.
Ang water concession deals ay binuo noon pang 1997 (panahon ni Fidel Ramos) na tatagal hanggang 2022 at pinalawig ng MWSS hanggang 2037 noong 2009 (panahon ni Gloria Macapagal-Arroyo).
Gayunman ay binawi ang extension ng concession agreement dahil sa umano’y ‘onerous’ provisions na nakapaloob dito.
- Latest
