Habang papasok sa trabaho… Pulis-Navotas itinumba

MANILA, Philippines — Nasawi noon din ang isang pulis-Navotas matapos ratratin ng ‘di pa natutukoy na riding-in-tandem habang sakay ng kanyang motorsiklo na patungo sa himpilan upang mag-duty naganap kamakalawa ng gabi sa Malabon City.

Ang pulis na napatay na tinangay pa pati ang motor at baril ay kinilalang si P/Cpl. Alex Santa Ana Vitug, Jr., 33, ng Blk. 10, Lt 15, Del Mar Subdivision, Llano, Caloocan City, at nakatalaga sa Mobile Patrol Unit ng Navotas City Police.

Nagsasagawa na ng follow-up ang mga pulis hinggil sa insidente at inaalam na rin ang pagkakakilanlan ng mga suspek.

Sa ulat, dakong alas-7:20, kamakalawa ng gabi, patungo na sana ang biktima sa presinto upang mag-duty nang sa pagsapit sa panulukan ng Areneta Ave. at Tuazon St., sa Brgy. Potrero ay biglang sumulpot ang mga salarin at pinagbabaril ang biktima hanggang sa duguang bumulagta.

Nang matiyak ng mga suspek na wala nang buhay ang target ay saka tinangay ang motorsiklo pati ang baril nito at tumakas sa ‘di nabatid na direksyon.

Patuloy ang imbestigasyon ng mga pulis sa naturang pamamaslang sa kanilang kabaro.