Shootout: Pulis, pusher patay

MANILA, Philippines — Patay ang isang pulis at target na drug pusher nang mauwi sa shootout ang anti-drug operation sa Norzagaray, Bulacan, kamakalawa.

Kinilala ang nasawing pulis na si PO3 Ronald Legaspi, nagtamo ng apat na tama ng bala sa tiyan at nasawing suspek na si Rolando Padura, alyas Jay Ar, 32, residente ng Block 18, Lot 57, Area H, Brgy. San Rafael, San Jose del Monte, Bulacan.

Sa ulat, nagsagawa ng buy bust operation ang mga anti-drug personnel ng Norzagaray Municipal Police Station (MPS) laban sa grupo ng suspek na si Jay R sa nabanggit na lugar.

Sa halip na sumuko ay nanlaban ang suspek na nauwi sa shootout at tinamaan sa tiyan si PO3 Legaspi at nasawi rin ang suspek.

Narekober sa pinangyarihan ng krimen ang mga basyo ng bala ng cal 9 MM, sampung cartridge ng nasabing armas, isang magazine ng 9 MM ammunitions, anim na transparent sachet ng shabu, mga alahas, cellphone at isang motorsiklo.