Lola na klerk ng LTO inutas ng tandem
![Lola na klerk ng LTO inutas ng tandem](https://media.philstar.com/images/the-philippine-star/headlines/20150310/Crime-5.jpg)
Napatay noon din ang isang 63-anyos na lola na empleyado ng Land Transportation Office (LTO) matapos barilin nang malapitan ng dalawang beses sa ulo ng hindi pa natutukoy na riding-in-tandem sa Brgy. Commonwealth, Quezon City kamakalawa ng gabi. File
Hindi umabot sa Grandparents Day ngayon..
MANILA, Philippines — Napatay noon din ang isang 63-anyos na lola na empleyado ng Land Transportation Office (LTO) matapos barilin nang malapitan ng dalawang beses sa ulo ng hindi pa natutukoy na riding-in-tandem sa Brgy. Commonwealth, Quezon City kamakalawa ng gabi.
Kinilala ni Quezon City Police District (QCPD) Director P/Chief Supt. Guillermo Eleazar ang biktima na si Lydia Villa, nakatalaga sa Office of the Transport Cooperative ng LTO at nakatira sa 056-IBP Rd. ng naturang barangay.
Sa imbestigasyon ni PO3 Elario Wanawan, ng Criminal Investigation and Detection Unit (CIDU), dakong alas-7:30 ng gabi nang maganap ang pamamaril sa biktima habang kasama nito ang kanyang apo at naghihintay na maluto ang biniling barbecue sa kanto ng Katipunan St. at IBP Rd.
Biglang sumulpot ang mga salarin at bumaba ang back rider at mabilis na pinaputukan nang malapitan ang biktima sa ulo gamit ang isang kalibre .45.
Tinutukan rin ng suspek ang apo ng biktima ngunit hindi naituloy ang pagbaril dito dahil sa nabulabog ito sa sigaw ng isang nakasaksing bystander at sa halip ay muli na lang binaril sa ulo ang biktima bago muling sumakay ng motorsiklo upang tumakas.
Mabilis namang isinugod ng mga saksi ang biktima sa pagamutan ngunit idineklara rin itong dead-on-arrival.
Narekober sa crime scene ang dalawang basyo ng bala ng kalibre. 45 baril.
Patuloy ang imbestigasyon ng pulisya sa motibo ng pamamaslang at ang mga nasa likod nito.
- Latest