Sa pagtanggap ng drug money... de Lima, kagawad kinasuhan sa Ombudsman

MANILA, Philippines - Kinasuhan sa tanggapan ng Ombudsman ni Albuera Police Chief Inspector Jove Espenido si Senator Leila de Lima at kagawad ng Barangay Benolho ng bayan ng  Albuera dahilan sa umanoy pagtanggap ng drug money.

Sa complaint affidavit ni Espinido na tumanggap si De Lima at kagawad ng payola mula sa umanoy Eastern Visayas drug lord na si Kerwin Espinosa.

Ang imbestigasyon ay nagbunsod nang pagkadiskubre sa iba’t ibang mga personalities na umanoy tumatanggap ng payola mula kay Kerwin na ngayon ay pinaghahanap ng pulisya.

Anya, ang pagtanggap ni De Lima ng drug money ay kinumpirma ng mismong ama ni Kerwin na si Albuera Mayor Rolando Espinosa Sr., na nakakulong na ngayon dahil sa kaso sa droga  at dating security guard at driver na si Marcelo Adorco.

Sa affidavit pa ni Espinido ay sinabi umano ni Adorco na nakipagkita siya noon kay De Lima sa Baguio City noong buwan ng Marso at nagpunta sa Burnham Park para sa isang photo session. 

Sinabi rin ng kapatid ni Kerwin na si Roland Kevin Espinosa  na siya  at kapatid na si Kerwin  ay  nakipagkita  kay De Lima  sa isang dinner sa Dampa restaurant noon  ding Marso para sabihin na tutulungan nila  ang  nooy Kalihim ng Department of Justice sa  kampanya para sa May 2016 senatorial elections.

Sinabi umano ni Roland Kevin Espinosa na iniabot pa umano niya ang dalawang bag na naglalaman ang bawat isa ng  P4 milyon halaga ng cash  sa dating driver at bagman  umano ni De Lima na si Ronnie Dayan.

Ang kinasuhang kagawad  ay ang pinagkatiwalaang tauhan ni Kerwin na tumutulong na magdala ng shabu mula Maynila papuntang Albuera, Leyte.

Magugunita na nang kinasuhan si De Lima ng Volunteers Against Crime and Corruption  sa Department of Justice (DOJ) kaugnay ng umanoy pagkakasangkot nito sa  drug trade sa loob ng New Bilibid Prison sa Muntinlupa.

Itininanggi naman ng senadora ang mga bintang at nagsabing walang katotohanan  na gawa- gawa lamang umano ng kanyang mga kalaban.