5 NPA rebels patay sa bakbakan
MANILA, Philippines - Limang miyembro ng mga rebeldeng New People’s Army (NPA) ang nasawi nang makasagupa ang tropa ng mga sundalo sa naganap na bakbakan sa Brgy. Mabuhay, Prosperidad, Agusan del Sur kamakalawa.
Batay sa ulat, bago nangyari ang bakbakan dakong alas-9:00 ng umaga sa nasabing barangay ay kasalukuyang nagpapatrulya ang tropa ng militar nang masabat ang nasa 60 rebelde at agad nagkaroon ng mainitang palitan ng putok na tumagal ng 40 minuto.
Ang mga rebelde ay mabilis na nagsitakas tangay ang nasawing mga kasamahan na naghiwa-hiwalay ng direksyon sa kagubatan.
Narekober sa pinangyarihan ng sagupaan ang isang AK 47 rifle, Improvised Explosives Device (IED) na kinabibilangan ng isang rifle grenade, limang blasting caps, isang ICOM radio, dalawang electrical detonating switch, isang cellphone, 200 metrong electrical detonating wire, limang backpacks, mga subersibong dokumento at mga personal na kagamitan.
Wala namang naiulat na nasugatan o nasawi sa panig ng mga sundalo sa nangyaring bakbakan.
- Latest
