Pamilya, 3 dedo sa military truck
MANILA, Philippines - Idineklarang dead on arrival sa ospital ang isang mag-asawa at kanilang anak matapos salpukin ang sinasakyan nilang motorsiklo ng isang military truck sa highway ng Barangay Looy, South Upi, Maguindanao kahapon ng madaling araw.
Ang nasawi ay ang mag-asawang JP at Cristina at kanilang anak na si Yassy Meria, kapwa residente ng Brgy. Burungutan, South Upi, Maguindanao.
Batay sa report, lulan ang mag-anak ng kanilang motorsiklo galing Lebak, Sultan Kudarat at pauwi na ng kanilang bahay, pero pagsapit sa kurbadang daan ng nasabing barangay ay nasalpok sila ng military truck ng Marine Battalion Landing Team (MBLT-5).
Ang pamilya ay isinugod sa pagamutan, subalit idineklarang dead on arrival habang sumuko naman ang driver ng military truck na si Pfc. Alexis Nadal.
Lumalabas na inokopa umano ng military truck na galing sa Awang, Datu Odin, Sinsuat, Maguindanao ang pakurbang daan ng kalsada at nabangga ang kasalubong na motorsiklo ng pamilya.
Sinasabing accident prone area ang naturang lugar at marami ng kahalintulad na aksidente ang nangyayari dito.
- Latest
