2 todas sa pamamaril

MANILA, Philippines – Napatay ang dalawa-katao sa naganap na magkahiwalay na karahasan sa pagsalubong sa Bagong Taon sa Isabela kamakalawa.

Kinilala ang mga napatay na sina Wilfredo Bantigue, 48, ng bayan ng Quezon; at John Jhon Laggui, 25, ng Cabagan. Base sa ulat ng pulisya, pauwi na si Bantigue mula sa sabungan nang harangin at pagbabarilin ng riding-in-tandem assassins sa Barangay Barucboc sa bayan ng Quezon. Naisugod sa Quezon Community Hospital subalit idineklarang patay ang biktima habang narekober sa crime scene ang ilang basyo ng cal. 45 pistol na bala.

Samantala, napatay habang nagmomotorsiklo si Johnjohn Laggui matapos itong ratratin ng magkapatid na suspek na sina Jomel Talaue at Melito Talaue sa Barangay San Rafael Abajo sa bayan ng Sto. Tomas, Isabela.

Alitan sa pamilya ang isa sa sinisilip na anggulo ng pulisya.