Naligo sa dagat matapos ang Christmas party... 5 mag-aaral nalunod
MANILA, Philippines – Malungkot ang magiging pagsalubong sa darating na Kapaskuhan ng pamilya ng limang batang nalunod matapos na nagkayaang maligo sa dagat matapos ang kanilang Christmas party sa eskwelahan naganap sa lalawigan ng Albay.
Kinilala ni P/Chief Inspector Dennis Balla, Tiwi Chief of Police ang mga natagpuang bangkay nina Anthony Colasi,10; Hasley Nuñez, 14; Mac Rey Rayala,11; at Louie Brucales, 9. Habang hindi pa matagpuan ang katawan ni Edcel Colasi,11, pawang mga mag-aaral ng Cararayan-Naga Elementary School.
Sa ulat ng Police Regional Office (PRO) V, ang mga biktima ay kagagaling lamang sa Christmas party ng kanilang eskuwelahan dakong alas-4:00 ng hapon nang magkayayaan umanong maligo sa dagat.
Sa kalagitnaan ng paglalangoy ay napagawi sa malalim na bahagi ng dagat ang mga bata na sinaklolohan naman ng kanilang mga kasamahan.
Gayunman, pare-parehong nalunod ang mga biktima matapos na lamunin ng dambuhalang alon.
Narekober naman ng nagrespondeng search and retrieval team ang bangkay ng apat sa mga biktima dakong alas- 7:00 ng gabi ilang oras matapos ang insidente.
- Latest
