Van nag-overtake: 3 patay
MANILA, Philippines – Minsan pang napatunayan na ang pagmamadali sa kalsada tulad ng pag-overtake ay sanhi ng aksidente tulad ng nangyari sa isang van na nasalpok ng pampasaherong bus na ikinasawi ng isang ama at dalawa nitong anak at pagkasugat ng maraming iba pa naganap sa kahabaan ng Maharlika Highway, Brgy. Agdangan, Baao, Camarines Sur kahapon ng madaling araw.
Kinilala ang mga nasawi na sina Jose Sabordo Jr. 43, may-asawa; anak na sina Mark Jayson,16; at John Vic , 5.
Nasugatan din ang mga sakay ng van na minamaneho ni Jose na sina Janine Sabordo, 7; John Michael Sabordo,11; Louie Benosa; Sandy Makahilig, 38; Edilberto Baluyot, 45, pawang mga residente ng Sitio Banase,Pawili, Bula, Camarines Sur at mga pasahero ng bus na sina Ceasar Rayan Baluso, 28; Daniel Sagala, 25; at Aldon Canas, 32.
Sa ulat bago nangyari ang aksidente dakong alas-2:30 ng madaling araw ay sakay ang pamilya Sabordo ng Isuzu van (WLC-160) na minamaneho ni Jose at binabaybay ang nasabing highway patungo sa Metro Manila.
Nag-overtake umano si Jose at nasalubong ang paparating na Philtranco bus (AJA – 4870) na minamaneho ni Dennis Bolabon na nagulat sa pagsulpot ng van kaya’t hindi na nito nagawang mailagan at nasalpok ito.
Dead on the spot ang magkapatid na sina Mark Jayson at John Vic habang dead on arrival sa ospital ang ama nila na si Jose.
Nakatakdang kasuhan ng pulisya si Bolabon ng reckless imprudence resulting to multiple homicide at multiple serious physical injuries.
- Latest
