Pinoys sa Qatar pinag-iingat sa ‘paluwagan’ scam

MANILA, Philippines - Pinag-iingat ng Embahada ng Pilipinas sa Doha, Qatar ang lahat ng mga overseas Filipino wor­kers (oFws) sa investment scam na ‘paluwagan’ na marami nang nabiktima.

Ayon sa report ng Embahada sa Department of Fo­reign Affairs (DFA), na dumagsa ang natanggap nilang reklamo mula sa mga naging biktima ng investment scam na nakilala sa tawag na “Invest Your Money and Earn Double” o paluwagan at “Fastline” na ino-operate ng grupo ng mga indibiduwal sa Doha.

Nabatid na nagsimula ang investment scam noong Marso 2015 na kung saan ang unang batch ng investors ay kumolekta umano ng na-invest na pera na may interes na 600% sa loob lamang ng 2-3 buwan at karamihan sa mga ito ay nire-invest ang kanilang pera upang kumita ng mas malaki.

Kaya’t kumalat ang ang balita sa iba’t ibang lugar at malls matapos na  makuha ng mga early investors ang kanilang shares o kita na may malaking interes na siyang naghimok sa mga investors sa alok na sumali at mag-invest.

Gayunman, laking dismaya at pagsisisi ng mga investor nang mapag-alamang ang kanilang pera na in-invest ay nawala at ang operator na kanilang tinatawag na mga lider ng “Invest  Your  Money  and  Earn  Double”  at “Fastline” ay hindi na makontak at tumakas palabas ng Qatar.