Capiz gov, anak guilty sa grave misconduct
MANILA, Philippines - Matapos mapatunayang guilty sa kasong grave misconduct ay pinasisibak ni Ombudsman Conchita Carpio Morales sa tungkulin si Capiz governor Victor Tanco, Sr. at anak nitong Vladimir Tanco na kanyang security officer.
Bukod sa pagkasibak sa serbisyo ay hindi na rin pinapayagan na humawak ng anumang posisyon sa gobyerno, kanselado ang eligibility at hindi tatanggap ng retirement benefits.
Nakakita din ng probable cause ang Ombudsman para kasuhan ang mag-ama ng paglabag sa Republic Act No. 3019 (Anti-Graft and Corrupt Practices Act) nang mangotong ng P3 milyon mula sa isang contractor.
Nabatid na ang mag-ama ay nagsabwatan sa paghingi at pagtanggap ng P3 milyon mula sa isang Leodegario Labao, Jr. ng Kirskat Venture (Kirskat), contractor ng P32.9 milyong Mambusao District Hospital project.
Ayon kay Labao noong September 19, 2011, dumating sa kanyang opisina si Vladimir na pinapunta ng kanyang amang si Gov. Tanco para kunin ang P3 milyon kapalit ng mabilis na pagpapalabas ng bayad ng lokal na pamahalaan sa naturang proyekto at kung hindi umano maibibigay ang hinihingi ay gagawing blacklisted ang Kirskat.
Hindi naman pinaniwalaan ng Ombudsman ang alibi ng mag-ama na utang ang naturang pondo dahil sa mga naipakitang ebedensiya ng complainant na nagtuturo sa pagkikil ng mag-ama sa kumpanya.
- Latest
